So‘nggi yillarda O‘zbekistonda turizm sohasini rivojlantirish va turistik hamda mehmondo‘stlik xizmatlarini xalqaro darajaga olib chiqishga alohida e’tibor qaratilmoqda. Shu maqsadda 2023-yil 26-apreldagi Prezident qarori (PQ–135) qabul qilindi.

Har yili sentabr oyida Toshkent Singapur Menejmentni Rivojlantirish Instituti O‘zbekiston Respublikasi Turizmni rivojlantirish davlat qo‘mitasi va Yoshlar ishlari agentligi ko‘magida “Millenniallar turizm festivali” xalqaro yoshlar festivalini o‘tkazadi. Festival turizmni mintaqaviy va xalqaro darajada rivojlantirish, shuningdek, mamlakatlar va universitetlar o‘rtasida madaniyatlararo hamkorlikni kuchaytirishga qaratilgan.

2018-yildan buyon festivalda Ozarbayjon, Belarus, Qozog‘iston, Qirg‘iziston, Rossiya, Singapur, Janubiy Koreya, Tojikiston va Turkiya davlatlarining yetakchi oliy ta’lim muassasalari vakillari, shuningdek, “Ipak yo‘li” xalqaro turizm universiteti, Samarqand davlat chet tillar instituti, Urganch davlat universiteti va Buxoro davlat universiteti kabi mahalliy OTMlar ishtirok etib kelmoqda.

2025-yil dasturi doirasida 23–26 avgust kunlari TSMRIda IV “Millenniallar turizm festivali” bo‘lib o‘tdi. Birinchi kuni “Turizm istiqbollari: innovatsiya va barqarorlik” mavzusida xalqaro konferensiya tashkil etildi.

Ikkinchi kuni Toshkent viloyati hokimligi bilan hamkorlikda Parkent tumaniga tashrif uyushtirildi. Ishtirokchilar “Fizika-Quyosh” instituti, Sukok qishlog‘i tabiati va Zarkent uzumzorlari bilan tanishdilar hamda milliy taomlar taqdimotida ishtirok etdilar.

Uchinchi kuni Husma & Spa Hotel hududida mehmondo‘stlik sohasiga oid master-klasslar va amaliy treninglar o‘tkazildi. Shuningdek, “Manas” universiteti vakili tomonidan ma’ruza tashkil etildi.

Festival yakunida mehmonlar uchun Toshkentcha to‘y oshi tayyorlash bo‘yicha master-klass va gala-kechki ovqat o‘tkazildi. Barcha ishtirokchilarga TSMRI rektori nomidan sertifikatlar va esdalik sovg‘alari topshirildi.